МАТЕРИАЛДЫҚ-ТЕХНИКАЛЫҚ БАЗА
Мектептің материалдық-техникалық базасы білім алушыларға сапалы білім мен тәрбие беруге, олардың шығармашылық және интеллектуалдық қабілеттерін дамытуға, қауіпсіз әрі қолайлы білім беру ортасын қалыптастыруға бағытталған.
Мектепте оқу-тәрбие процесін ұйымдастыруға қажетті оқу кабинеттері, компьютерлік техника, интернет желісі, спорттық нысандар, кітапхана, асхана, медициналық және қауіпсіздікке арналған қажетті құралдар қарастырылған.
Материалдық-техникалық база білім беру ұйымының оқу бағдарламаларын жүзеге асыруға, заманауи білім беру технологияларын қолдануға және білім алушылардың жеке қабілеттерін дамытуға мүмкіндік береді.
Мектеп ғимараты
Мектеп ғимараты білім алушылардың білім алуына және педагогтердің кәсіби қызметін жүзеге асыруына қажетті жағдайлармен қамтамасыз етілген.
Мектеп ғимаратында оқу кабинеттері, әкімшілік кабинеттер, педагогтерге арналған бөлмелер, кітапхана, спорттық нысандар, асхана және басқа да қажетті функционалдық бөлмелер орналасқан.
Мектептің ішкі кеңістігі білім алушылардың жас ерекшеліктеріне және оқу процесінің талаптарына сәйкес ұйымдастырылған.
Ғимаратта санитариялық-гигиеналық талаптарды, өрт қауіпсіздігі және еңбек қауіпсіздігі талаптарын сақтау бойынша қажетті жағдайлар жасалған.
Оқу кабинеттері
Мектептегі оқу кабинеттері білім беру процесін сапалы ұйымдастыруға қажетті жиһаздармен, оқу құралдарымен, көрнекі материалдармен және техникалық жабдықтармен қамтамасыз етілген.
Әрбір оқу кабинетінде білім алушылардың оқуына қолайлы жағдай жасауға арналған парталар, орындықтар, мұғалім үстелі, тақта және оқу-әдістемелік материалдар орналастырылған.
Пән кабинеттерінде оқу бағдарламасына сәйкес көрнекіліктер, плакаттар, дидактикалық материалдар, пәндік құралдар және басқа да оқу ресурстары пайдаланылады.
Заманауи техникалық құралдарды пайдалану сабақ барысында білім алушылардың белсенділігін арттыруға және оқу материалын тиімді меңгеруіне мүмкіндік береді.
Компьютерлік жабдықтар
Мектепте білім беру процесін цифрландыру және білім алушылардың цифрлық құзыреттілігін дамыту мақсатында заманауи компьютерлік техника мен ақпараттық-коммуникациялық технологиялар кеңінен қолданылады.
Компьютерлік кабинеттер білім алушылардың ақпараттық сауаттылығын арттыруға, цифрлық ресурстармен жұмыс істеу дағдыларын қалыптастыруға және практикалық тапсырмаларды орындауына мүмкіндік береді.
Оқу процесінде компьютерлер, ноутбуктер, планшеттер, интерактивті панельдер және басқа да техникалық құралдар пайдаланылады. Педагогтер цифрлық құрылғыларды сабаққа дайындалу, электрондық оқу материалдарын әзірлеу, құжаттарды жүргізу және білім алушылардың оқу жетістіктерін бақылау мақсатында қолданады.
Мектептің цифрлық мүмкіндіктері
3 – компьютерлік кабинет;
99 – компьютер;
8 – ноутбук;
39 – планшет;
18 – интерактивті панель;
50 – компьютерлік сыныптарда білім алушы.
Мектептің заманауи цифрлық инфрақұрылымы білім алушылардың ақпараттық сауаттылығын арттыруға, цифрлық құзыреттілігін қалыптастыруға және білім беру сапасын жетілдіруге бағытталған.
Цифрлық технологияларды тиімді пайдалану – білім алушыларды заманауи талаптарға сай білім алуға және болашаққа дайындаудың маңызды тетігі.
ИНТЕРНЕТ ЖЕЛІСІ
Сапалы білімге – заманауи цифрлық қолжетімділік
Мектебімізде білім алушылар мен педагогтердің ақпараттық ресурстарды тиімді пайдалануына мүмкіндік беретін интернет желісі ұйымдастырылған.
Интернет желісі оқу процесінде электрондық білім беру платформаларына, цифрлық оқу ресурстарына, ақпараттық жүйелерге, электрондық оқулықтар мен қажетті оқу материалдарына қол жеткізу мақсатында пайдаланылады.
Педагогтер сабақ барысында интернет ресурстарын, электрондық оқулықтарды, бейнематериалдарды және басқа да цифрлық білім беру құралдарын тиімді қолданады. Бұл білім алушылардың ақпаратты іздеу, талдау және цифрлық ресурстармен жұмыс істеу дағдыларын дамытуға ықпал етеді.
Интернет желісінің мүмкіндіктері
Электрондық білім беру платформаларына қолжетімділік
Цифрлық оқу ресурстарын пайдалану
Электрондық оқулықтармен жұмыс жасау
Бейнематериалдар мен мультимедиалық ресурстарды қолдану
Қажетті ақпаратты жедел іздеу және пайдалану
Интернет желісінің қолжетімділігі – заманауи білім беру ортасын қалыптастырудың маңызды бөлігі.
Бейнебақылау және өткізу жүйесі
Қауіпсіздік – басты назарда
Мектебімізде білім алушылар мен қызметкерлердің қауіпсіздігін қамтамасыз ету мақсатында күзет қызметі, өткізу жүйесі, бейнебақылау және дабыл түймесі ұйымдастырылған.
Мектептің өткізу пункті 2 турникет бекетімен жабдықталған. Өткізу пунктінде арнайы күзет қызметі жұмыс істейді. Күзет қызметкерлері мектепке кіріп-шығуды бақылауды және қауіпсіздік талаптарының сақталуын қамтамасыз етеді.
Мектеп ғимараты мен аумағында 65 ішкі және сыртқы бейнебақылау камерасы орнатылған. Оның ішінде 32 бейнебақылау камерасы Жедел басқару орталығына (ЖБО) қосылған.
Бейнебақылау жүйесі мектеп ғимараты мен аумағындағы қауіпсіздікті бақылауға, кіріп-шығу жағдайын қадағалауға және жалпы пайдаланылатын орындардағы жағдайды бақылауға мүмкіндік береді.
Сонымен қатар мектепте төтенше жағдай туындаған кезде жедел әрекет ету мақсатында дабыл түймесі қарастырылған.
Қауіпсіздік жүйесінің негізгі көрсеткіштері
-2 турникет бекеті – өткізу жүйесін ұйымдастыру;
-Арнайы күзет қызметі – мектептегі қауіпсіздікті қамтамасыз ету;
-65 бейнебақылау камерасы – мектептің ішкі және сыртқы аумағын бақылау;
-32 камера – Жедел басқару орталығына (ЖБО) қосылған;
-Дабыл түймесі – төтенше жағдай кезінде жедел әрекет ету мүмкіндігі;
-Өткізу жүйесі – мектепке кіріп-шығуды бақылау;
-Бейнебақылау жүйесі – мектеп ғимараты мен аумағындағы қауіпсіздікті тұрақты бақылау.
Бейнебақылау, өткізу, күзет және дабыл жүйелері білім алушылар мен қызметкерлер үшін қауіпсіз әрі қолайлы білім беру ортасын қалыптастыруға бағытталған.
Қауіпсіздік – сапалы білім беру ортасының маңызды негізі.
Спорттық нысандар
Салауатты өмір салты – дені сау ұрпақ кепілі
Мектебімізде білім алушылардың дене шынықтырумен тұрақты айналысуына, спорттық қабілеттерін дамытуына және салауатты өмір салтын қалыптастыруына қажетті жағдайлар жасалған.
Мектепте сыртқы футбол және баскетбол алаңдары, сондай-ақ ішкі спорт залы бар. Спорттық нысандар білім алушылардың дене дайындығын жетілдіруге, спортпен айналысуына және түрлі спорттық іс-шараларға қатысуына мүмкіндік береді.
2023 жылы мектептің сыртқы футбол және баскетбол алаңдарына ағымдағы жөндеу жұмыстары жүргізілді.
2025 жылы мектептің ішкі спорт залына ағымдағы жөндеу жұмыстары жүргізілді. Сонымен қатар, киім ауыстыру бөлмелеріне қыздарға арналған 2 дана, ұлдарға арналған 2 дана киім ілетін шкаф орнатылды.
Спорттық және зияткерлік ойындарға арналған құрал-жабдықтар
Мектептің спорттық-материалдық базасы білім алушылардың әртүрлі спорт түрлерімен, ұлттық және зияткерлік ойындармен айналысуына қажетті құрал-жабдықтармен қамтамасыз етілген:
Доптар – футбол, баскетбол және басқа спорт түрлеріне арналған
Шахмат – зияткерлік ойындарға арналған
Шашка – логикалық және стратегиялық ойлауды дамытуға арналған
Тоғызқұмалақ – ұлттық зияткерлік ойын ретінде логикалық ойлау мен есептеу қабілетін дамытуға арналған
Гимнастикалық матрастар – дене шынықтыру және жаттығу жұмыстарына арналған
Арқандар – дене дайындығы мен шапшаңдықты дамытуға арналған
Қол күрес үстелі – қол күресі жаттығуларына арналған
Секіртпелер – қимыл-қозғалыс белсенділігін арттыруға арналған
Обручтар – гимнастикалық және жалпы дене жаттығуларына арналған
Басқа да спорттық құрал-жабдықтар – дене шынықтыру және спорттық жаттығуларға арналған
Білім алушылар сабақтан тыс уақытта спорттық үйірмелерге, жарыстарға, шахмат, шашка, тоғызқұмалақ және басқа да зияткерлік ойындарға, сондай-ақ түрлі дене шынықтыру-сауықтыру іс-шараларына белсенді қатысады.
Мектептің спорттық нысандары мен спорттық және зияткерлік ойындарға арналған құрал-жабдықтармен қамтамасыз етілуі білім алушылардың денсаулығын нығайтуға, дене дайындығын жетілдіруге, ұлттық және зияткерлік ойындарға қызығушылығын арттыруға, логикалық ойлау қабілетін дамытуға және салауатты өмір салтын қалыптастыруға мүмкіндік береді.
Спорт пен зияткерлік ойындар – дені сау, ойы ұшқыр әрі жан-жақты дамыған ұрпақ қалыптастырудың негізі!
Асхана
Дұрыс тамақтану – денсаулық кепілі
Мектепте білім алушылардың сапалы және дұрыс тамақтануын ұйымдастыруға арналған 50 орындық асхана жұмыс істейді. Асхана қажетті жиһаздармен, ас дайындауға және тамақтануды ұйымдастыруға арналған жабдықтармен қамтамасыз етілген. Білім алушылардың тамақтануына қолайлы әрі санитариялық талаптарға сай жағдай жасалған.
Асхананың қызметі санитариялық-гигиеналық талаптарға сәйкес ұйымдастырылған. Асханаға санитариялық-эпидемиологиялық қорытынды алынған. Білім алушылардың тамақтануын ұйымдастыру барысында тағамдардың сапасы мен қауіпсіздігіне, азық-түлікті сақтау және дайындау талаптарының сақталуына ерекше көңіл бөлінеді.
Асхананың мүмкіндіктері
Санитариялық-эпидемиологиялық қорытынды алынған
50 орын – білім алушыларды тамақтандыруға арналған
Ас дайындауға арналған жабдықтар
Қажетті жиһаздармен қамтамасыз етілген
Санитариялық-гигиеналық талаптар сақталады
Сапалы әрі қауіпсіз тамақтануды ұйымдастыруға жағдай жасалған.
8. Қауіпсіздік
Қауіпсіз мектеп – сенімді болашақтың негізі
Мектебімізде әрбір білім алушының өмірі мен денсаулығы – басты құндылық. Осыған орай, оқушылар мен мектеп қызметкерлері үшін қауіпсіз, жайлы және қолайлы білім беру ортасын қалыптастыруға бағытталған кешенді қауіпсіздік шаралары жүзеге асырылады.
Мектеп ғимаратында өрт қауіпсіздігі құралдары, эвакуациялық шығу жолдары және қауіпсіздік белгілері қарастырылған. Қауіпсіздік талаптарын сақтау – оқу-тәрбие процесінің маңызды бөлігі.
2025 жылы мектептегі өрт дабылы жүйесіне толық ауыстыру жұмыстары жүргізіліп, ағымдағы жөндеу жұмыстары орындалды. Бұл жұмыстар өрт қауіпсіздігі жүйесінің тиімділігін арттыруға және төтенше жағдайлардың алдын алуға бағытталған.
Білім алушыларға өрт қауіпсіздігі, жол қозғалысы қауіпсіздігі, электр қауіпсіздігі және төтенше жағдайлар кезіндегі іс-әрекет тәртібі тұрақты түрде түсіндіріледі. Оқушылардың төтенше жағдай кезінде дұрыс әрекет ету дағдыларын қалыптастыру мақсатында оқу-жаттығу және түсіндіру жұмыстары жүргізіледі.
Төтенше жағдайлар кезіндегі іс-әрекет дағдыларын қалыптастыру мақсатында білім алушылар мен мектеп қызметкерлерінің қатысуымен оқу-жаттығу іс-шаралары тұрақты түрде өткізіледі. Оқу-жаттығу барысында эвакуациялау тәртібі, қауіпсіздік талаптарын сақтау және төтенше жағдай кезінде дұрыс әрекет ету дағдылары пысықталады.
Қауіпсіздік – ортақ жауапкершілік
Өрт қауіпсіздігі – өрттің алдын алу және қауіп кезінде дұрыс әрекет ету
Жол қауіпсіздігі – жол қозғалысы ережелерін сақтау
Электр қауіпсіздігі – электр құралдарын қауіпсіз пайдалану
Төтенше жағдайлар – кез келген жағдайда сабырлы әрі дұрыс әрекет ету
Эвакуациялық қауіпсіздік – эвакуациялық шығу жолдарын білу және пайдалану
Мектептегі қауіпсіздік шаралары білім алушылардың жауапкершілігін, сақтық мәдениетін және қауіпсіз мінез-құлық дағдыларын қалыптастыруға, сондай-ақ қауіпсіз білім беру ортасын қамтамасыз етуге бағытталған.
Біздің мақсатымыз – әр баланың мектепке алаңсыз келіп, қауіпсіз ортада білім алып, өз болашағына сеніммен қадам басуына жағдай жасау.
Қауіпсіз мектеп – жарқын болашаққа бастар сенімді қадам!
Мүмкіндігі шектеулі жандар үшін қолжетімді орта
Мектебімізде мүмкіндігі шектеулі білім алушылар мен келушілер үшін қолжетімді, қауіпсіз және қолайлы орта қалыптастыруға ерекше көңіл бөлінеді.
Ғимаратқа кедергісіз кіріп-шығуды қамтамасыз ету мақсатында пандус және мүмкіндігі шектеулі жандарға арналған арнайы санитарлық торап қарастырылған.
Мектеп ғимаратының ішінде қауіпсіз қозғалысты және бағдарлануды қамтамасыз ету мақсатында арнайы сары бағыттаушы жолақтар мен тактильді плиткалар орнатылған. Бұл құралдар көру қабілеті төмен және ерекше қажеттіліктері бар азаматтардың ғимарат ішінде еркін әрі қауіпсіз қозғалуына мүмкіндік береді.
Мектепте барлық білім алушылар үшін тең мүмкіндік қалыптастыру, қауіпсіз әрі қолжетімді білім беру ортасын қамтамасыз ету бағытындағы жұмыстар жүйелі түрде жүргізіледі.
Санитарлық тораптар
Мектептің санитарлық тораптары білім алушылар мен қызметкерлерге қолайлы санитарлық-гигиеналық жағдай жасау талаптарына сәйкес жабдықталған.
2025 жылы мектеп ғимаратының үш қабатындағы санитарлық тораптарға ағымдағы жөндеу жұмыстары жүргізілді. Қазіргі таңда әрбір қабаттағы санитарлық тораптар жылы сумен қамтамасыз етілген.
Мектеп бойынша санитарлық тораптарда 18 дана қол жуатын раковина және 36 дана әжетхана нүктесі бар.
Санитарлық тораптардың жылы сумен қамтамасыз етілуін және мектеп ғимаратындағы қолайлы температуралық жағдайды қамтамасыз ету мақсатында 2026 жылы мектептің жылу жүйелері толықтай ауыстырылды.
Санитарлық тораптардың тазалығы мен санитарлық жағдайы тұрақты бақылауда ұсталады. Әрбір үзіліс сайын санитарлық тораптар тазаланып, белгіленген тәртіпке сәйкес хлор құрамды дезинфекциялық құралдармен өңделеді. Қажетті санитарлық-гигиеналық құралдар үнемі қамтамасыз етіліп отырады.
Жүргізілген жөндеу және жаңарту жұмыстары мектептің материалдық-техникалық базасын нығайтуға, санитарлық-гигиеналық талаптардың сақталуын қамтамасыз етуге және білім алушыларға қауіпсіз әрі қолайлы жағдай жасауға бағытталған.
